ياريتني نحول وانتي زينة ...كل يوم نا وياك في جردينه
وين نحطه نلاقوا رفيق العمر بوفرفطة...مزخرف اجناحه بفن يعجب خطة..معاه نقعدوا اناجوه ويناجينا
وقدمنا تسبح اصغار البطة...وحنا فراحه ضاحكة عينينا
وين شافنا الابوط زاد توطا..نزل من العلايل فوق بحيينا
ونهر صافي والربيع بشطة..منظر جميل بشوفته يغنينا
ونطيرو عليه ونعملو في نطة..فرفور بيده ليمنه ايحيينا
ياريتني نحول كل يوم في زهره معاك انجول...نحطو رفاقه علي زهار الفول ومنه نطيروا فوق من اليسمسنه
لا نفسدوا لا ناكلو محصول نمصوا الرحيق ومصته تكفينا
نعيشو طرابه عمرنا عالطول ولابشر حاسدنا يراقب فينا
وين ريت دارو للصغار رسوم عجبني بفنه ورسمته وتلوينه
تابعته قيسه اطناشر يوم للقنا حب ومحاكي بيه زهينا
وراكم تقولو ياعرب درويش راهو خبر واضح عند فسارينا
ياريتني نحول وانتي زينة ...كل يوم نا وياك في جردينه